A Glemone il cine cambiât dopo la muart di Kennedy

Dopo la polse pes fiestis e torne a tacâ ai 10 di Zenâr, ogni miercus aes 8.30 sot sere li dal Cine “Sociale” di Glemone, la rassegne che e acompagne e e integre la mostre “Allo specchio dell’era Kennedy” (“Al spieli de ete Kennedy”), par cure di Sergio M. Grmek Germani, fate dal Comun di Glemone cu la Cineteche dal Friûl e visitabile fint ai 6 di Jugn a jentrade libare. Il cine in program al “Sociale” al è “Sette giorni a maggio” (jessût intal 1964) di John Frankenheimer, cun Burt Lancaster, Kirk Douglas e Ava Gardner: un zâl fantapolitic cun riferiments al contest storic, in particolâr ae Vuere frede. Il cine al è stât zirât intal 1963 e modificât intal finâl dopo il sassinament dal president Kennedy. (A.I.) – 09.01.2024