La cuistion dal tierç mandât e somee dividi la maiorance. Il coordenadôr regjonâl di Fratelli d’Italia, Walter Rizzetto, al conferme che al è in cors un resonament: “La cuistion – al sclarìs il deputât – si met intes scjadincis prossimis in Ligurie e in Venit. Il prin pas al è capî cui che a saran i candidâts partint de Sardegne e dopo o podìn fevelâ di tierç mandât”. Rizzetto al zonte però une frase: “Fedriga al è un governadôr otim, ma o pensi che Fratelli d’Italia si sedi rinfuarçât e duncje o vin di mediâ tra chestis posizions”. Dut câs pal partît di Giorgia Meloni la sielte e sarà nazionâl e leade ancje aes provinciis eletivis. “Il Friûl-Vignesie Julie cundut de autonomie – al conclût Rizzetto – al larà daûr des decisions nazionâls”.
Marco Dreosto, coordenadôr de Lega, al è di parê contrari: “Par nô a àn di jessi i citadins a sielzi i aministradôrs, che a sedin sindics o governadôrs e duncje nissun limit”. Dreosto al vise dopo che “la Regjon Friûl-Vignesie Julie e à autonomie sul teme”. La segretarie regjonâl dal Partito democratico, Caterina Conti, intant e va al atac: “Cu la Sanitât che e va simpri piês, lis fameis che a sfadiin fin ae fin dal mês, la denatalitât che no si ferme, lis prioritâts de diestre a son fâ il tierç mandât e rimeti lis provinciis. Ven a stâi, economie e sociâl a van mâl e lôr a pensin aes poltronis”. (a.d.g.) – 09.01.2024
