Gnûf president pe Comunitât dal Friûl Orientâl

Cambi ae vuide de Comunitât Friûl Orientâl, l’ent che al da dongje i vot comuns di Buri, Cividât, Muimans, Pradaman, Premariâs, Prepot, Remanzâs e S. Zuan dal Nadison, condividint servizis tant che Polizie locâl, Banc Unic pes Ativitâts Produtivis (SUAP), Resonarie, Tribûts, Gjestion dal personâl economic e juridic, Ufici informatic. Ogni municipi al met a disposizion lis propriis competencis, cooperant inte organizazion e inte gjestion di funzions e servizis comunâi. A Enrico Basaldella, sindic di Muimans, che al à terminât il mandât, al sotentre il sindic di Cividât Daniela Bernardi. Intal comitât diretîf al reste Basaldella, vicepresident, intune cul sindic di Pradaman Enrico Mossenta. Ae vuide de Comunitât, che e servìs 37 mil abitants, al è stât confermât Claudio Del Fabro, diretôr gjenerâl. (a.d.g.) – 10.01.2024