Une gnove barufe e je sucedude îr di sere, pôc prime de miezegnot, inte ex caserme Cavarzerani di Udin.
Il belanç al è di trê personis feridis, dutis compagnadis al pront socors dal ospedâl di Udin par jessi medeadis. A son marochins, che a àn 35, 26 e 25 agns. A àn ripuartât scussadis e feridis di tai. Inte pestadice salacor a son stâts doprâts curtìs.
Cuant che i carabinîrs a son intervignûts in fuarcis, cui militârs de stazion di Martignà e cun chei de Radiomobile di Udin, dai partecipants ae barufe nol jere plui segn. A jerin dome i ferîts, che a àn sclarît ai stes carabinîrs di jessi stâts agredîts dentri de struture di bande di altris forescj.
Lis investigazions a stan lant indenant e i militârs de Arme a son daûr a cirî di individuâ lis personis che a àn cjapât part ae barufe. La enesime, aromai, inte ex caserme Cavarzerani. (a.d.g.) – 12.01.2024
