Linie dure dal prefet di Udin, Domenico Lione, dopo i episodis di violence sucedûts intai dîs passâts a Tumieç. Intant che i responsabii des barufis a son in fase di identificazion e segnalazion ae Procure, Lione al à sigurât che la rispueste des fuarcis dal ordin, in mût particolâr inte zone de stazion des corieris, no si fasarà spietâ.
Dal rest a Tumieç la pâs e je finide dopo che di resint, a Cjavaç, a son rivâts cierts minôrs forescj no acompagnâts – soredut egjizians – ospits intal ex albierc Olivo. Al è propit chi che îr di sere polizie locâl e polizie di stât, intune percuisizion, a àn cjatât intune stanzie une britule, un baston e un pugn di fier. Materiâl che, secuestrât, al jere di un dai partecipants ae barufe di miercus di sere.
Miercus dopomisdì, apont, la gote che e à fat lâ parsore il vâs cuant che un gruput di zovins egjizians al è rivât li de stazion des corieris di Tumieç e al à tacât beghe cun altris fantats dal puest. La rivade dai carabinîrs e à evitât il piês.
Îr di sere, simpri li de autostazion, il presidi des fuarcis dal ordin al à sconzurât che si podès ripeti la stesse sene dal dì prime. A dâsi apontament un gruput di nordafricans rivât in coriere di Udin. Un regolament di conts, cun tant di invît a partecipâ impostât sui social.
Joibe di sere al jere presint ancje il sindic Roberto Vicentini, che al à disbratât il cjamp di ogni dubi: “O sin une comunitât ospitâl e o continuarìn a jessilu, ma cierts episodis a son a dî pôc disgrâts. O speri che la situazion e puedi tornâ ae normalitât il prime pussibil”.
Une desene di minôrs forescj logâts dai 20 di Novembar tal ex albierc Olivo a Cjavaç a saran trasferîts a Udin dopo i episodis di microcriminalitât regjistrâts intal teritori che a vevin puartât il prin citadin Gianni Borghi a protestâ, puartant la poltrone di sindic tal mieç de strade. (a.d.g.) – 12.01.2024
