Storiis di une preson tal mieç dal mâr

La vite dentri di une preson uniche tal mont, tal mieç dal mâr, dulà che i oms a cirin il propri riscat personâl traviers il lavôr: e je chê contade in “Gorgona”, miôr documentari talian al “Festival dei popoli 2022”. Al sarà propit il regjist Antonio Tibaldi a presentâ il cine al Visionario di Udin martars ai 16 e il dì dopo al Cinemazero di Pordenon aes 8.45 sore sere. La isule preson di Gorgona, a 19 miis di Livorno, e je la ultime colonie penâl agricule de Europe. Su chest tocut di tiere, une nonantine di detignûts a tachin un percors rieducatîf basât sul lavôr, de cure des bestiis ai lavôrs intai cjamps. Par jessi ametûts a coventin carateristichis precisis: nissun leam cu la criminalitât organizade, nuie problemis di tossicodipendence e une pene avonde lungje di permeti di costruî un percors di rieducazion. Il voli de telecjamare al puarte il spetatôr intune imersion a clâr inte vite di cinc detignûts. (A.I.) – 15.01.2024