Une comiche di 50 agns in vuere cu la vite

Il circuit dal Ert al propon dôs seradis in compagnie di Paola Minaccioni, comiche e atore pal cine, il teatri e la television, protagoniste dal monolic “Stupida Show!”, scrit di Gabriele De Luca pe produzion di Carrozzeria Orfeo. Il spetacul, che al à tant che sottitul “Paola Minaccioni Special”, al larà in sene martars ai 16 tal Teatri Sociale di Glemone e miercus ai 17 di Zenâr tal Auditorium Aldo Moro di Cordenons. Il test al indaghe une sdrume di temis che a apartegnin simpri plui aes urgjencis di dute la coletivitât: diferencis di gjenar, maternitât, sessualitât, famee, podê, solitudin, violence, tensions sociâls. Sul palc e larà sù une femine bessole di 50 agns, cu la bielece disfloride e in vuere cu la vite, cun siums impussibii, ma ancjemò buine di trasformâ lis sôs feridis e i faliments intune comicitât di no crodi. (A.I.) – 15.01.2024