Gnûfs incentîfs par cui che al assum zovins e feminis in Friûl-Vignesie Julie. La Regjon e à adotât ciertis modificazions al regolament introdusint dôs gnovis categoriis par otignî i contribûts, o sedi chê dedicade ai zovins tra i 18 e i 35 agns disocupâts di almancul 4 mês consecutîfs e chê dedicade aes feminis disocupadis di almancul 4 mês consecutîfs. A son cambiaments metûts in vore par combati i contrats a timp determinât di pôcs mês e la precarietât consecuente.
Lis variazions su lis Politichis ativis dal lavôr a son stadis ilustradis cheste matine dal assessôr regjonâl al Lavôr e Formazion Alessia Rosolen, che e à sotlineât cemût che di là dal disvantaç di gjenar si vedi di contrastâ ancje il disvantaç gjenerazionâl.
Cul gnûf regolament in vore di chest mês, i incentîfs par assunzions a timp determinât, che a rivuardin ancje i over 60 disocupâts di almancul 4 mês consecutîfs, a assegnin ai datôrs di lavôr un contribût base di 2.500 euros, che si puedin zontâ altris 2.500 euros pal nucli familiâr monoparentâl là che al sedi cjapât dentri almancul un fi minôr di etât. Rivuart aes assunzions a timp indeterminât, l’impuart dal incentîf al è di 5.000 euros pes feminis disocupadis di 4 mês, lis personis disocupadis di 12 mês, i disocupâts di 6 mês che a vedin ativât il percors Gol e pai zovins tra i 18 e i 35 agns disocupâts di 4 mês. (a.d.g.) – 15.01.2024
