Di vinars ai 19 di Zenâr dal 2024 a laran in onde su Telefriuli i episodis di “I Numaruts”, la gnove serie animade in lenghe furlane firmade de BBC. La gnove e je stade pandude di cualchi setemane, ma cumò e je rivade la date uficiâl: di vinars ai 19 di Zenâr dal 2024 in ogni pontade di “Maman!”, su Telefriuli, al sarà ancje un episodi di “I Numaruts”. La otave edizion de trasmission par fruts in lenghe furlane, risultât di une coproduzion fra la ARLeF – Agjenzie regjonâl pe lenghe furlane e la rêt televisive (in onde fin al mês di Jugn, ducj i vinars aes 6.30 sore sere e in repliche di domenie aes 7 di buinore e ae 1 dopomisdì) e darà acet ancje al gnûf carton animât produsût propit de Agjenzie, su licence di Videoplugger Ltd.
I episodis a vignaran inserîts ancje inte programazion di Telefruts (in onde su la stesse emitente di lunis a joibe aes 16.00) e a son a disposizion ancje sul sît e sul canâl YouTube de ARLeF.
“I Numaruts” a son la version par furlan (cun dopleadure curade dal CSS Teatro stabile di innovazione del Friuli Venezia Giulia, e la traduzion dal Sportel regjonâl pe lenghe furlane de ARLeF) dai “Numberblocks”, un carton de BBC che al à tant che protagoniscj modonuts simpatics e une vore colorâts che a judaran i plui piçui a imparâ la matematiche, in particolâr lis tabelis des moltiplicazions, cjantant, zuiant e gjoldintse: un supuart didatic pai docents, ma ancje pes fameis. La serie di fat e je stade realizade cu la consulence dal National Centre for Excellence in the Teaching of Mathematics – Centri Nazionâl pe Ecelence tal Insegnament de Matematiche e e je stade nomenade par un premi BAFTA te categorie “Aprendiment”.
I trente episodis a proponaran storiis là che i numars a vivin piçulis aventuris o situazions pardabon straniis, par esempli la partecipazion a un spetacul, a un conciert rock o un viaç intal spazi e vie indevant.
Un prodot colorât e divertent che al rivarà a stiçâ ancje la curiositât dai grancj. Di fat, la musiche e à un rûl fondamentâl inte narazion, tant che i autôrs a àn sielzût di citâ lis atmosferis di musichis innomenadis, come i musicals West Side Story, Jesus Christ Superstar, ma ancje rielaborazions di Tchaikovsky o lis atmosferis dal rock. (a.d.g.) – 16.01.2024
