Gino Pozzo al riscje la preson in Spagne

Gino Pozzo, il fi dal paron dal Udin Gianpaolo Pozzo, al riscje la preson par problemis fiscâi, almancul daûr des notiziis che a rivin de Spagne, dulà che, ae fin di une investigazion, il judiç dal Tribunâl nazionâl Santiago Pedraz al à ordenât la viertidure di un procès cuintri il Granada Fc, il so ex president Quique Sanchez Pina e altris trê imputâts. Tra chescj, il fi dal proprietari dal Udinês, Gino Pozzo, fin al 2016 paron dal Granada e cumò dome dal Watford, in Ingletiere. La Procure Anticoruzion spagnole e varès solecitât par Pozzo une condane a 12 agns di preson e une multe di 27 milions di euros par reâts fiscâi. Dal Udin, che no je cjapade dentri tal procediment, la puntualizazion che l’aciertament al rivuarde la societât di balon Granada e no in maniere direte Pozzo, e che la autoritât judiziarie e veve za archiviât il procediment intal 2022. (A.I.) – 17.01.2024