Ancje a Cjampfuarmit e sarà poiade une Piere di intop (“Stolperstein”, par todesc). Cun cheste iniziative la Aministrazion comunâl e celebre la Zornade de Memorie, onorant Eutimio Pagani, une des vitimis tra i concitadins depuartâts e muarts in cjamp di concentrament. La ricercje puartade indevant di Anna Colombi cu la colaborazion di Mario Barel, incjariâts dal progjet “Cultura Nuova”, e à puartât ae individuazion di Pagani, nassût a Listize ai 2 di Otubar dal 1892 e che po dopo al è lât a stâ Cjampfuarmit. Puartât vie de sô abitazion al 1n di Novembar dal 1944 e arestât, al fo in preson a Udin fint ai 7 di Fevrâr dal 1945, cuant che al vignì depuartât a Mauthausen, dulà che al murì ai 9 di Fevrâr dal 1945: il so cuarp nol è stât mai cjatât. La Piere di intop e sarà colocade devant dal Municipi di Cjampfuarmit ai 26 di Zenâr. (A.I.) – 19.01.2024
A Cjampfuarmit une piere par un citadin muart a Mathausen
79