Il “Laghetto Alcione” al restarà sierât al public par doi mês. Cheste la decision cjapade dal cuestôr Alfredo D’Agostino, che al à decidût di sospindi la ativitât che si cjate a Udin Sud par 60 dîs, dopo dal delit fat il prin dal an, che al à provocât la muart di Ezechiele Mendoza Gutierrez di 31 agns.
Il stop al locâl di Baldassarie Basse, decidût par motîfs tant grâfs di ordin e sigurece publiche, al è fintremai superiôr a ce che a segnin lis normis. La misure, di fat, e ten cont dai 3 proviodiments mandâts fûr intai ultins 6 agns simpri dopo di episodis di rilevance penâl regjistrâts in vie Prati.
La istrutorie, inviade dopo dal omicidi, e à permetût cun di plui di scuvierzi che la sale di bal e jere disprivade di un servizi regolâr di sigurece dilunc des fiestis, tacadis la ultime dì dal an e al jere frecuentât di clients ritignûts pericolôs, disponûts ae violence e alterâts de assunzion fûr di misure di alcul. (a.d.g.) – 19.01.2024
