Pietro Nobile, la storie di un architet gurizan a Viene

Miercus ai 24 aes 6 dopomisdì a Gurize, tal Palaç Coronini Cronberg, si tignarà un gnûf apontament de serie di incuintris “Storiis gurizanis: vôs e documents di un teritori”, inmaneâts dal Archivi di Stât di Gurize e de Fondazion di Palaç Coronini. Rossella Fabiani, storiche de art e za funzionari de Sorintendence, e tignarà une conference dal titul “Pagine architettoniche. Il fondo Pietro Nobile. Storia e conservazione” (Pagjinis architetonichis. Il fonts Pietro Nobile. Storie e conservazion). Intal 1952, la Sorintendence ai monuments, aes galariis e ae antichitât di Triest e à cuistât la racuelte di dissens dal architet Pietro Nobile (1776-1854), un dai protagoniscj dal panorame architetonic de prime metât dal decim novesim secul: plui di vot mil sfueis che a testemonein la ativitât di studi, di insegnament e di progjetazion che Nobile al à davuelt par dute la sô cariere di architet e di professôr inte Academie di Viene. Cualchi progjet al è esponût ae mostre “Francesco Caucig Goriziano 1755-1828”, che si pues viodi fint ai 24 di Març intes Scudariis di Palaç Coronini. (A.I.) – 22.01.2024