Luigi Cimolai al lasse la presidence dal Cda

Cambi ae vuide dal Cda de Cimolai Spa. Ae presidence nol sarà plui Luigi Cimolai, che al restarà in dut câs azionist di riferiment. Al è stât lui stes a segnâ tant che so sucessôr Marco Sciarra, che al è presint in aziende di 23 agns cun rûi di prin plan.  Sciarra si metarà dongje dal aministradôr delegât Sergio Iasi intal rilanç de aziende, insiemi cu la colaborazion determinante e laboriose di dute la direzion aziendâl e dai colaboradôrs. La decision e conferme il procès in at viers une gjestion dirigenziâl inviât ai 20 di Dicembar cul insediament di un gnûf Consei di Aministrazion. “Il 2024 – al sclarìs Luigi Cimolai intune note – al è l’an de rinassite inte lungje storie de Cimolai Spa dopo lis dificoltâts aziendâls causadis de crisi finanziarie che, ancje dilunc des fasis plui delicadis dal 2022, no à mai metût in discussion la soliditât industriâl de aziende. O continuarai a jessi di supuart cu la mê capacitât, esperience, storie e passion ae continuitât aziendâl”. (a.d.g.) – 24.01.2024