Une patulie de Squadra volante de Polizie di Udin îr di sere e à socorût un anzian dilunc de tangjenziâl. L’om al jere stât viodût cjaminâ in çavatis dilunc de strade tant traficade di cualchi vuidadôr, che al à alertât la Polizie preocupât pes sortis dal om che al aparive in stât confusionâl palês.
Une volte rivât, i agjents a àn cjatât l’anzian infredulît, disorientât, cence documents e cuntun vistiari inadat par riparâsi dal frêt. L’om nol rivave nancje a fevelâ. Ai agjents al è semeât clâr che l’anzian si fos slontanât di cjase di scuindon dai familiârs e duncje lu àn acompagnât in Cuesture, dulà che i àn dât alc di mangjâ e riscjaldât. Dopo cualchi ore, une fantate di Udin si è presentade in Cuesture par denunziâ la sparizion dal pari anzian che si jere slontanât di cjase cence che jê e savès nuie. L’om al è stât duncje afidât daurman aes curis de fie. (a.d.g.) – 30.01.2024
