Lavoradôrs in neri, mancjade formazion, nissun control sanitari e presidis antifûc e di prin socors carents o assents. Une vore di inadempiments grâfs in materie di sigurece a àn obleât i Carabinîrs dal Nucli Ispetorât dal Lavôr di Udin a sospindi trê ativitâts – doi ristorants e une imprese edîl – e a scrivi sanzions par passe 90 mil euros.
Il stop ai lavôrs al à rivuardât un cantîr atîf a Tumieç, che al so interni al è stât cjatât il pericul di cjadude intal vueit pai muredôrs che a lavoravin. La imprese e je stade multade dai militârs dal Nil cun 12 mil euros.
Simpri inte capitâl cjargnele al è stât sospindût ancje un ristorant, dulà che al è stât cjatât un lavoradôr no regolarizât. Par cheste ativitât e je rivade une sanzion di 6 mil euros. Pal stes motîf al è stât fermât e multât cun 10 mil euros ancje un locâl di Remanzâs.
Altris ispezions a àn permetût ai carabinîrs di sanzionâ cun 30 mil euros un bar di Magnan in Riviere, cun 12 mil euros un bar di Tarvis e cun 11 mil euros une sale zûcs di Palme. Altris 10 mil euros di multe, infin, a son stâts dâts a une aziende agricule di Cuar di Rosacis, par no vê sometût a visite mediche i siei lavoradôrs e parcè che no veve formât i assegnâts antifûc e di prin socors. (a.d.g.) – 01.02.2024
