Risultâts une vore positîfs par CrediFriuli

CrediFriuli e siere il 2023 cun risultâts une vore positîfs che a consolidin la sô posizion primarie dentri dal Grup Bcc Iccrea e a ribatin il rûl di protagoniste economiche e finanziari in Friûl-Vj. Il belanç di esercizi, aprovât di pôc dal Cda, si è sierât cuntun util net di 27,3 milions di euros (plui 30% a pet dal 2022). Ai 31 di Dicembar, lis massis aministradis in dut a àn passât i 3 miliarts di euros cuntune incressite dal 5% a pet dal esercizi precedent, gjenerât dal plui 2,3% segnât dai impleis ma, prin di dut, dal aument sensibil de racuelte indirete (plui 25%), dulà che e salte fûr la cressite ecelente dai volums di sparagn gjestît (plui 60,17%), a testemoneance de fiducie cressinte ricognossude a CrediFriuli. Dilunc dal esercizi, la bancje e à regjistrât la viertidure di plui di 3.300 gnûfs conts corints e la jentrade in grup di plui di 330 gnûfs socis, cu la base sociâl che e passe i 11.000 socis. In ambit di bonus edilizis (Superbonus cjapât dentri), CrediFriuli e rapresente un dai pôcs istitûts di credit che al à inviât impuartants acuardis di cession pai credits fiscâi a cuintriparts assicurativis, industriâls e al cjâf grup par plui o mancul 28,5 milions di euros, dome intal 2023 (che si sumin ai 6,9 milions di euros dal 2022), permetint di sodisfâ altris clients e socis, che a chescj si zontaran altris, par altris 10 milions di cessions, dilunc dal 2024. (a.d.g.) – 05.02.2024