Pordenon si coloche ai vertiçs de classifiche taliane pe sveltece dai timps di paiament inte aministrazion publiche, a pâr cun Grosseto e devant di Padue. A evidenziâlu e je une investigazion dal Centri Studis Ents Locâi. La capitâl dal Friûl ocidentâl l’an passât e à saldât i siei debits in pôc plui di 8 dîs, cun plui di 21 dîs di anticip a pet dal timp massim concedût dal ordenament talian. In linie cu lis regjons dal Nord e dentri dai limits di leç ancje chei altris Comuns dal Friûl-Vignesie Julie: Triest par paiâ al met cuasi 16 dîs, Gurize e Udin plui o mancul 20.
Ae fin de classifiche a son lis capitâls di provincie dal Sud che a implein in medie un mês in plui di chei dal Centri Nord par saldâ i lôr debits. Maie nere a Napoli, che si conferme la grande citât cun timps di paiament plui luncs: 173 dîs de ricezion di une fature, plui o mancul sîs mês. (a.d.g.) – 06.02.2024
