Al “Verdi” une stele de danze mondiâl

Sabide ai 10 e je la zornade dal prin avigniment di danze dal cartelon 2024 dal Teatri Verdi di Pordenon, firmât dal consulent artistic Roberto Prosseda. E torne in Italie la ultime coreografie che la stele mondiâl de danze Carolyn Carlson e à firmât pe sô compagnie: “The Tree (Fragments of poetics on fire)”, pardabon un berli di amôr pe nature, un spetacul di fuarce poetiche e simboliche ecezionâl, che al rive a Pordenon in esclusive pal Nord Est. Cumbinant il virtuosisim dai balarins e la vision oniriche de grande coreografe, “The Tree” al ufrìs une espression potente e vitâl a pro di une nature che e je dongje dal colàs, ma cu la sperance di une rinassite des propriis cinisis, tant che une fenîs. (A.I.) – 09.02.2024