I zovins dal conservatori di Triest a sunin par Mattarella

Il Conservatori di musiche “Giuseppe Tartini“ di Triest al torne al Quirinâl: juste un an dopo la esibizion pes celebrazions uficiâls de Zornade dal ricuart, la Orchestre di Arcs dal “Tartini” e sarà di gnûf al centri dai avigniments programâts par vinars ai 9 in presince dal President de Republiche, Sergio Mattarella. La cerimonie istituzionâl e sarà mandade in direte su Rai1. A Rome, acompagnâts dal President dal Conservatori, Daniela Dado, e il diretôr Sandro Torlontano a laran i zovins de Orchestre di Arcs: 16 students tor dai 21 agns che a vegnin di 9 nazions diferentis (Italie, Montenegro, Serbie, Bulgarie, Ucraine, Perù, Turchie, Slovenie e Bielorussie), par mantignî la vocazion cosmopolite de istituzion. (A.I.) – 08.02.2024