Teis di Pordenon, tierç round. I ambientaliscj e lis associazions a difese dai cincuantatrê arbui, che il lôr abatiment al è previodût dal plan dal gnûf Polo Young, no si dan par vinçûts e a domandin l’intervent dal Consei di Stât. Obietîf al è di otignî cun cheste clamade une sospensive dal abatiment dai arbui.
Sospensive za domandade e za dineade dal Tar dal Friûl-Vignesie Julie, che si è esprimût intes setemanis passadis a pro dal Comun pordenonês. La vicende dai teis e je al centri dal progjet dal centri sportîf, che par chel a son previodûts 23 milions dal Pnrr, a pericul se il cantîr nol partìs in timps curts.
L’abatiment dai teis al è stât anunziât dal Comun pe fin dal mês, fuart de vie libare de bande dai judiçs: l’obietîf di Legambiente Pordenon e dal Grup Tiglio Verde al è rivâ a fâ aciertâ la etât dai arbui, che se a vessin di vê plui di setante agns a saressin tutelâts par leç. La decision e je stade cjapade dilunc di une assemblee publiche, che e à fat za partî la racuelte fonts par sostignî lis gnovis spesis legâls. (a.d.g.) – 12.02.2024
