“Lis primis valutazions sul andament dal setôr agroalimentâr in Friûl-Vignesie Julie tal 2023 a confermin l’impat negatîf dal brut timp su lis cuantitâts prodotis. Se, di une bande, tal an passât si è regjistrât un gjenerâl sbassament dai coscj dai fatôrs produtîfs (energjie, fertilizants, pasturis), di chel altri lis cundizions climatichis aviersis a àn determinât un impat negatîf su lis resis e su la cualitât dai prodots. Grancj ancje i dams causâts de tampiestade record de fin di Lui, fenomen cence precedents fin cumò”.
Chest il coment dal assessôr regjonâl aes Risorsis agroalimentârs, forestâls e itichis, Stefano Zannier, che vuê al è intervignût inte sede de Regjon a Udin ae presentazion dal rapuart “Focus Agricoltura FVG 2023” elaborât dal Ersa. L’assessôr al à volût dî graciis al grup di Ersa pal lavôr fat e pal sucès de ativitât di statistiche e monitorament rivât ae cuarte edizion consecutive. (a.d.g.) – 16.02.2024
