No va ben une Europe che e met la agriculture intune gabie di diviêts e che e fâs jentrâ tal marcjât prodots forest che no si sa ben cemût che a son stâts fats. E compagn, no va ben une Europe che e permet di meti tal plat dai siei citadins mangjative fate cui insets e cu la cjar fate cun machinis e la chimiche.
“Al covente un gnûf pat tra contadins e consumadôrs” e dîs la europarlamentarie furlane Elena Lizzi (Lega Identità e Democrazia), che e je une vore impegnade te Comission Agri, dulà che e à puartat indenant bataiis impuartantis pe difese dai prodots di chenti.
“Il passaç ecologjic che la Europe e à di fâ nol pues pesâ su lis spalis dai contadins, che a àn ducj i dirits di viodi paiât il lôr lavôr e rivâ ae fin dal mês – e va indenant Lizzi -. Nô o sin cuintri i eco mateçs de çampe che e vûl imponi diviêts che a puedin dome distruzi une agriculture che e garantìs a ducj nô il mangjâ e che e difint il nestri teritori. Cence contadins no varìn plui mangjâ bon e san, no varìn plui un doman”.
Il lavôr de Lizzi si fonde ancje su lis propuestis puartadis indenant tal Parlament European. Come chê leade aes Tecnichis di evoluzion assistude, che no son di confondi cui Ogm e che a son une vore studiadis de Universitât dal Friûl e dal Istituto di genomica applicata (Iga) di Udin.
“Lis Tea – e zonte Lizzi – a permetin di fâ rindi miôr lis culturis e di sparagnâ aghe e prodots cuintri lis besteutis, judant cussì i contadins a frontâ il cambiament dal clime”.
Di chê altre bande, la Europe e à ancje di difindi i interès dai consumadôrs.
“Nô o difindìn lis Indicazions Gjeografichis cuintri chei che a cirin di imponi etichetis dal Nutriscore, il vin cence alcul e la speculazion sul cjâf di chei che a produsin – e siere Lizzi -. La Europe par vê un doman e à di rindi plui fuartis lis sôs lidrîs ancje tal mangjâ”.
(Informazion par cure dal grup “Identità e democrazia – Lega Salvini Premier”) – 19.02.2024
