Il stadi dal Udin al larà indevant cul soreli

La societât Udinese Calcio e Bluenergy Group a realizaran un implant fotovoltaic di avanvuardie che al sarà parsore de cuviertidure dal stadi di proprietât dal club furlan. Passe 2.400 panei solârs di ultime gjenerazion a permetaran di produsi une medie di plui o mancul 3.000 kWh/dì fasint la struture autosuficiente in tiermins energjetics. La realizazion e zontarà altris elements di inovazion a un implant sportîf di avanvuardie, che al rapresente za vuê un riferiment in Europe pai stadis dal avignî in tiermins di multifunzionalitât, sigurece e sostignibilitât. Il progjet dal gnûf implant fotovoltaic, curât di Bluenergy, al à podût contâ sul supuart dal Politecnic di Milan. L’implant pe produzion di energjie solâr dal Bluenergy Stadium al varès di jentrâ in funzion dentri di Otubar, al sarà un pas indenant par fâ deventâ l’implant il prin de file pal balon talian inte sfide pal azerament des emissions di anidride carboniche. (A.I.) – 20.02.2024