Une verze in man e la voie di puartâ indevant la bataie. Il Coordenament salût publiche al à manifestât cuntun presidi devant dal ospedâl di S. Vît dal Tiliment inte ultime dì di racuelte firmis – passade cuote 14.000 – par domandâ di tornâ a vierzi il Pont nassite e difindi la sanitât publiche dal Sanvidot. Tantis firmis cetancj che a son i abitants di S. Vît, che a son 15 mil.
Devant dal ospedâl a jerin presintis une setantine di personis, fra politics, sindicaliscj e ancje int comune che e à firmât la petizion che e sarà consegnade al president dal Consei regjonâl Mauro Bordin ai 23 di Març, intant che ai 14 li dal auditorium Zotti e sarà une assemblee publiche sul teme. Ancje la aministrazion comunâl e je di mês al flanc dai ativiscj e e domande al assessôr Riccardo Riccardi di rindi cont des sôs sieltis. (a.d.g.) – 23.02.2024
