A saran scoltadis dentri di sabide intal interogatori di garanzie lis dôs mestris de scuele de infanzie di vie Fratelli Cervi a Roncjis di Monfalcon, ai arescj domiciliârs par presumûts maltrataments cuintri di une frute disabile.
Lis dôs feminis, une mestre di rûl di grande esperience e une di poie, a son in stât di arest di îr di matine: la decision de autoritât judiziarie e je rivade ae fin des investigazions dai Carabinîrs de stazion locâl, scomençadis tal Dicembar passât e inviadis dopo di une segnalazion, interne al istitût, di presumûts “tirons de bande di docent personâl ai dams di une frute cun disabilitât”. I Carabinîrs a riferissin di vê documentât diviers episodis sucedûts dispès ancje devant di chei altris fruts. Propit pal pericul di ripetizion dai maltrataments suspietâts, il Gip al à confermât la misure cautelâr pes dôs insegnantis. E il dì dopo al è ancjemò grant il sconciert a Roncjis. Sul argoment al è intervignût ancje il president de Regjon Massimiliano Fedriga: “Se a fossin confermadis lis acusis – al à evidenziât – si cjataressin devant di un fat di une gravitât di no crodi”. (a.d.g.) – 27.02.2024
