Un Istitût simpri plui a pro dal Friûl e dai Furlans: al è chest, in struc, il messaç fondamentâl de assemble de Societât Filologjiche Furlane che si fasarà domenie ai 3 di Març a lis 10.30 a matine in Palaç Mantica, sede di Udin. L’apontament cu la assemblee al è un moment impuartant par fâ un belanç, no dome economic, da la ativitât dal sodalizi, ma al è ancje une ocasion par mostrâ ai socis, e plui in gjenerâl a la comunitât furlane, lis iniziativis che la Filologjiche e à puartât indevant tal 2023 e chês in program pal 2024. Tra lis ativitâts realizadis tal cors dal 2023, lis tantis manifestazions (la Setemane de culture furlane in Mai, cu la “Fraie de Vierte” a Prepot, e il Congrès sociâl a Montreâl in Otubar), i cors pratics di lenghe e culture furlane in dut il Friûl, il completament dal progjet de Biblioteche digjitâl furlane e l’inviament dal sît internet techefriulane.it. Ma ancje la publicazion e la mostre sul artist Carlo da Carona e sui scultôrs lombarts dal Rinassiment in Friûl e, ancjemò dongje, la animazion dal fumet “Ti conti il Vaiont”, realizât tai 60 agns dal plui grant disastri ambientâl dal Nûfcent par prudelâ la memorie tes gjenerazions plui zovinis. Ancje chest an la assemblee e sarà la ocasion par presentâ il Belanç sociâl de Filologjiche, un imprest fondamentâl pe “rendicontazion” no dome economiche e finanziarie des ativitâts, ma ancje par podê fâ une valutazion dal “impat sociâl” dal sodalizi pe comunitât e pal teritori furlan.
(A.I.) – 02.03.2023
Foto di R. Viola
