Il turisim tignût sù de archeologjie

Cemût fasial un lûc a mantignî la sô identitât? Al rive a fâlu cuant che i leams cul so passât, la sô storie e la sô culture a vegnin conservâts e puartâts indevant. Chest in struc al è il teme de conference “Scoprire Antiche Civiltà”, dedicade propit al rûl de archeologjie tal turisim, in program martars ai 12 di Març te sale Bobi Bazlen di Palazzo Gopcevich a Triest. A fevelâ a saran Angela Borzacconi, diretore dal Museu Archeologjic Nazionâl di Cividât, e Nadia Pasqual, professioniste de comunicazion cun impuartantis esperiencis tal setôr dal turisim. I argoments a previodin il valôr dal ricognossiment de Unesco, la valorizazion culturâl dai sîts archeologjics, la part dai museus al dì di vuê, il rapuart jenfri archeologjie, comunitât, identitât. (A.I.) – 11.03.2024