I finaliscj dal Premi in onôr di Terzani

Cinc volums che a judin a capî miôr lis tragjediis coletivis dal nestri timp, che a incuietin i nestris pinsîrs e a conturbin la nestre vision dal futûr: la vuere cussì dongje, la catastrofe dai migrants, il consolidâsi di regjims opressîfs, la margjinalitât estreme des personis plui fragjilis e indifesis, lis incognitis de inteligjence artificiâl. La jurie e à anunziât i nons dai cinc finaliscj dal premi leterari internazionâl Tiziano Terzani, un ricognossiment inmaneât e promovût de associazion culturâl vicino/lontano di Udin adun cu la famee Terzani. Il non dal vincidôr – i finaliscj a son Ai Weiwei, Sally Hayden, Benjamín Labatut, Leila Mottley e Damir Ovčina – al sarà pandût tor de metât di Avrîl. Sabide ai 11 di Mai la consegne dal ricognossiment a Udin. (A.I.) – 20.03.2024