Vincj lûcs di scuvierzi cu lis zornadis dal FAI

A son passe 750 in 400 citâts de Italie i lûcs pôc cognossûts e par solit inacessibii che a saran vierts sabide ai 23 e domenie ai 24 di Març pe trentesime seconde edizion des Zornadis de Vierte dal FAI, il Fonts pal ambient talian. Ancje il Friûl-Vignesie Julie al è pront par fâ viodi ai visitadôrs storie, nature, art e culture dal teritori in doi dîs di fieste e di sensibilizazion. Achì di nô a son stâts tirâts dentri vot puescj par fâ discuvierzi 20 lûcs che a son particolârs par carateristichis storichis, artistichis e naturâls. Gurize e invide ae scuvierte dal parc Basaglia, pai cent agns de nassite di Franco Basaglia: il lûc di dulà che il psichiatri al invià il so percors rivoluzionari, passant ancje pe palacine “Feminis” dal ex Ospedâl psichiatric e la ex colonie agricule. Pordenon e pant i segrets dal centri storic, dal Antico Ospitale dei Battuti ae Glesie dal Crist, il Municipi e altris palaçs, ma ancje Villa Baschiera-Tallon. Fûr de citât, si vierç la centrâl idroeletriche di Ponte Giulio a Montreâl. Udin vierte dome in provincie: il Museu “Gortani” di Tumieç, aziendis agriculis dongje di Cividât e la cjase dal artist Giuseppe Zigaina a Çarvignan. A Triest, visitis te Universitât, ma ancje tal osservatori astronomic e chel cul non di Margherita Hack. (A.I.) – 22.03.2024