Vile de Claricini Dornpacher e torne a vierzi lis visitis

E je rivade la biele stagjon e Vile de Claricini Dornpacher, a Butinins di Muimans, si prepare a dâ di gnûf acet al public. La prime viertidure e je previodude par domenie ai 7, cuant che al sarà pussibil scuvierzi la storie e i tancj segrets de cjase dal Sîscent, cjaminâ intal zardin ae taliane e intal parc dongje, cu lis sôs essencis secolârs. Tirade sù tor de metât dal decim setim secul de famee de Claricini, che si jere trasferide di Bologne in Friûl ae fin dal 1200, e conserve dentri diviersis colezions preseabilis di art. Dongje des visitis vuidadis (tacant des 10 di matine) al sarà ancje pussibil cerçâ i vins prodots de aziende agricule De Claricini. (A.I.) – 05.04.2024