Une comedie “nere” che e critiche i agns Sessante

Al sarà di ridi tal Teatri comunâl di Cormons, martars ai 9 cun “Il malloppo”, une comedie “nere” cu la ande de farse e une comicitât dissacrante. Scrite dal inglês Joe Orton, e je une critiche dispietade ae societât dai agns Sessante, cun dialics sureâls che a vegnin dal teatri dal assurt. Gianfelice Imparato, Marina Massironi e Valerio Santoro a son i protagoniscj di une storie cuntun stîl anarchic, cuintri lis formis de “buine societât borghese”. Ducj i personaçs a son une vore fanatics, lant dal estremisim criminâl dai zovins fint ae ande reazionarie dai grancj. (A.I.) – 08.04.2024

Foto di M. Alessi