Cristicchi al torne par cjantâ e contâ Battiato

Daspò de fortunade tournée de passade stagjon, al torne tal circuit dal ERT “Torneremo ancora”, il “conciert mistic” par Franco Battiato cun Simone Cristicchi e Amara, lis vôs protagonistis dal apontament di martars ai 9 tal Auditorium Centri Civic di S. Vît dal Tiliment, za dut plen in prevendite. I rangjaments a son di Valter Sivilotti, impegnât ancje a sunâ il piano e te direzion musicâl dai soliscj de Accademia Naonis di Pordenon, di U.T. Gandhi aes percussions e de sopran Franca Drioli. Cristicchi e Amara a frontin cun creance e rispiet il repertori mistic di Battiato, puartant indevant i messaçs spirituâi che a àn fat imortâl la opere dal Mestri. (A.I.) – 08.04.2024