Turisim a fumets: ve il cuart numar

“Lis aventuris di no crodi di Ivan in Friûl-Vignesie Julie. Vals dal Nadison e Doberdò” al è il titul (voltât par furlan) de cuarte liste ilustrade di “Turisim a fumets”, progjet dal PAFF!, curât di Valentina Angelone e finanziât de Regjon. I protagoniscj de storie a son Ivan e une frute che lu strissine intun viaç di cognossince dal teritori dentri des Vals dal Nadison e no dome, jenfri realtât e imagjinazion. Une mini vuide furnide di mape, dedicade a cui che nol è mai stât in chestis zonis, che e rimande ai lûcs descrits. La senegjature e je di Francesco Matteuzzi, lis ilustrazions di Valentina Angelone: lis taulis cjoltis dal ultin numar di “Turisim a fumets”, adun cuntune selezion di imagjins dai volums precedents (dedicâts a Aquilee, Polcenic e Spilimberc) a son in mostre li dal PAFF! di Pordenon di vinars ai 19. (A.I.) – 18.04.2024