Al è lât ae gjornaliste irlandese Sally Hayden pal so libri investigazion “E la quarta volta siamo annegati” (E la cuarte volte o sin inneâts), jessût in Italie par Bollati Boringhieri, la vincjesime edizion dal premi leterari internazionâl Tiziano Terzani, inmaneât de associazion culturâl “vicino/lontano” di Udin intun cu la famee Terzani, tal non dal gjornalist e scritôr florentin. Il comunicât al è stât pandût de presidente de jurie Angela Terzani Staude, la femine di Tiziano, che e à fevelât di un servizi une vore rigorôs e cuntune veretât cetant fuarte, che “e presente in detai il cuadri di ce che al sucêt di là dal Mediterani, tai lager dal Doimil, che nus oblein a domandânus lis resons di un scandul umanitari là che ancje noaltris o sin responsabii, tant che citadins europeans e talians”. Pai vincj agns dal Premi, la jurie e à decidût di dâ une segnalazion speciâl al artist e ativist cinês Ai Weiwei pal so libri “Mille anni di gioie e dolori”. Un apel al Ocident a no doprâ la censure e a mantignî simpri il dirit ae libertât de espression artistiche e di cualsisei altre espression. (A.I.) – 22.04.2024
Foto di R. Meagher
