A Cividât une gruesse cunvigne sui Langobarts

A son stâts achì mancul di doi secui, ma a àn lassât olmis cetant impuartantis pe citât, fintremai il non che e à cjapât! Al è ancje par merit lôr che dal 2011 Cividât al è inte liste dal Patrimoni mondiâl de Unesco, intune cun altris sîs comuns di dute Italie. Ai Langobarts, massime a un sovran che al è une des figuris plui significativis de storie medievâl, e je dedicade une cunvigne internazionâl che, di miercus ai 24 fint a domenie ai 28 di Avrîl, si davuelzarà inte ex Forum Julii e inte Vile de Claricini Dornpacher, tal borc di Butinins di Muimans. Intitulade “Grimoaldo. Dal ducato friulano al regno”, la cunvigne e je promovude de Fondazion de Claricini Dornpacher: par cinc dîs di incuintris e di conferencis, e clamarà dongje i plui grancj studiôs de storie e de civiltât langobarde, passe 70, par fevelâ dai agns centrâi dal setim secul. (A.I.) – 23.04.2024