La Universitât dal Friûl e à intitulât a pre Pierluigi Di Piazza, fondadôr dal centri di acet “Ernesto Balducci” di Çuian, la aule di studi di 120 puescj al plan tiere de Biblioteche sientifiche. Daspò dal tai dal nastri, e je rivade la benedizion dai spazis e la scuvierture simboliche di un panel lunc cuatri metris e alt un e mieç dedicât al predi furlan origjinari di Tualiis, frazion dal Comun cjargnel di Comelians. Il panel al mostre une foto di pre Pierluigi e une sô frase impuartante a pro de promozion de dignitât umane e cuintri de indiference. La cerimonie di fat e je stade clamade “No sta voltâti di chê altre bande”, une frase simbul dal so pinsîr e de sô opare. Muart a 74 agns, intal 2022 dopo une malatie in pôc timp, pre Di Piazza al veve vût la lauree honoris causa in Siencis economichis dal Ateneu furlan.
Ae scree a jerin presints il retôr Roberto Pinton, la professoresse Marina Brollo, autore de laudatio a Di Piazza cuant che al à ricevût la lauree, so fradi Vito Di Piazza e il filosof Massimo Cacciari. Daspò dal tai dal nastri, li che si è zontât il sindic di Udin, po e je stade la benedizion di bonsignôr Guido Genero, vicjari gjenerâl de Arcidiocesi di Udin. (a.d.g.) – 23.04.2024
