Musiche sunade dal vîf par cines di cent agns indaûr

Une serade speciâl chê di martars ai 30 a Pordenon te suaze de rassegne di cine mut “Capolavori centenari” (Oparis mestris centenariis), un progjet promovût di Cinemazero in colaborazion cu lis Zornadis dal cine mut e la Cineteca del Friuli. Sul grant schermi a saran proietâts “Entr’Acte” (1924) e “Paris qui dort” di René Clair, che a contin la citât di Parîs intai agns Vincj dal secul passât, cuant che e jere al centri dal mont e e viveve une epoche di grancj cambiaments. Ducj i doi cines a saran compagnâts dal vîf al piano di Juri Dal Dan, un musicist cressût cul jazz, che al à za scrit musichis par cines muts cu la Zerorchestra e cun altris formazions, sunant cun lôr in cetantis ocasions (Zornadis dal cine mut, Mittelfest, Cinemazero). (A.I.) – 29.04.2024