Un grant fûc si è impiât intes partignincis dal Hotel Marina Uno di Lignan Riviere cjapant soredut la zone dal ristorant Newport, che dentri a stavin fasint lavôrs di manutenzion prime de prossime viertidure pal Istât.
La ativitât si cjate dongje dal albierc a cuatri stelis, sierât di agns al public e che propit fra 15 dîs al sarà metût in vendite ae aste judiziarie par un impuart di plui o mancul 3 milions di euros.
L’alarme in viâl Adriatico al è partît pôc dopo de une dopomisdì. Une ore dopo i pompîrs a àn rivât a distudâ il fûc che al saltave fûr dal cuviert dal imobil. Dutis lis dîs personis che si cjatavin dentri dal ristorant a son jessudis a pene viodudis lis primis flamis. Doi di lôr a son restâts un pôc intosseâts e a àn vût bisugne des curis dal personâl sanitari. (a.d.g.) – 29.04.2024
