Il Friûl al saludarà l’inzegnîr Gianpietro Benedetti, muart domenie passade, sabide intal Domo di Udin.
Aes 5 dopomisdì la catedrâl e darà acet ae “cerimonie de peraule”, un ricuart coletîf e condividût par onorâ e ingraciâ il president dal Gruppo Danieli par dut chel che al à fat intal ambit industriâl e sociâl dilunc de sô vite.
La celebrazion e sarà vuidade di bonsignôr Luciano Nobile e e sarà trasmetude in direte di Telefriuli.
A saran presints rapresentants istituzionâi e religjôs, imprenditôrs e int che e à lavorat a flanc dal inzegnîr. Amîs e i cjâfs de aziende a fevelaran par ricuardâ l’imprenditôr, che al à lassât un segn in Friûl e in Italie.
Il prin a ricuardâlu al sarà l’aministradôr delegât dal Gruppo Danieli, Giacomo Mareschi Danieli, par dopo lassâ la peraule a Camilla Benedetti, fie di Gianpietro e vice president dal Grup. (a.d.g.) – 03.05.2024