Simpri plui rabie a Fossalon di Grau pe continue pierdite di servizis a pro de comunitât. Il comitât Pro Fossalon al à inviât inte frazion la racuelte di firmis par domandâ di stacâsi di Grau e di lâ dentri dal teritori di Flumisel–Vile Visentine, plui dongje e cun ducj i servizis che a ocorin. Al sarès un cambiament che al permetarès ai residents di Fossalon di vê dome un interlocutôr par dutis lis dibisugnis (Municipi, scuelis, pueste e miedi di famee).
“La comunitât di Fossalon – al à dit Renato Trombetta, fevelant a non dal comitât intune note – e je simpri plui rabiose e deludude parcè che no je scoltade des istituzions. E chest cun dut che lis normativis regjonâls plui resintis a cirin di rinfuarçâ il welfare par blocâ il spopolament e rindi plui atratîf il teritori pes fameis e cun dut che il Comun di Grau, che al à lis frazions di Fossalon e Boscat, al sedi intal elenc des isulis che par chês a son proviodudis misuris buinis par sigurâ la cressite sociâl e economiche”. (a.d.g.) – 08.05.2024
