Une serade par no dismenteâ il Vaiont

La Cineteche dal Friûl e presente a Pordenon, in colaborazion cun Cinemazero e inte suaze de “Setemane de culture furlane”, trê dai cinc documentaris che a son stâts racuelts intal dvd “Vaiont 60 – Documentari 1961-1966”, publicât pai 60 agns dal disastri che ai 9 di Otubar dal 1963 al à causât la muart di cuasi 2 mil personis. L’apontament, a jentrade libare, al è vinars ai 10 aes 8.45 sot sere tal Cinemazero. La proiezion e scomence cuntun curt filmât amatoriâl che al puarte indaûr al Istât dal 1961 e che al mostre un grup di boy scout rivâts par amirâ “la dighe plui alte dal mont”. Po dopo, dôs des testemoneancis plui impuartantis sui avigniments daspò dal disastri: “La tragedia del Vajont” (1964) dal regjist Luigi Di Gianni e “Vaiont ’66” di Antonio De Gregorio. (A.I.) – 09.05.2024