Une femine di Gurize e je stade fraudade il dì dal so otantesim secont complean di un delincuent che le veve svicinade cul metodi de “finte cauzion” par no lassâ lâ in preson il fi, cjapât dentri intun incident stradâl che nol jere mai stât. Un compliç al telefon si jere presentât come maressial dai carabinîrs e al veve convinçude la vitime a dâ dut ce che e veve al fraudadôr che si jere presentât su la puarte: passe 11 mil euros in contants, 600 euros de pension a pene cjapade, zoiis di aur e pieris preziosis par un valôr in dut di passe 20 mil euros.
La puare femine, a pene che si è inacuarte de fraude, e à clamât daurman i carabinîrs, che in pôc timp a àn rivât a cjatâ fûr il suspiet de fraude, un om di 40 agns origjinari dal Napoletan, che al jere in viaç cul tren.
Par fortune l’om acusât de fraude al è stât blocât cuant che al è smontât in provincie di Napoli, indulà che lu àn fermât cun intor ancjemò la robe puartade vie. (a.d.g.) – 14.05.2024
