Fraudadôrs napoletans ancjemò in azion a Gurize, indulà che la Polizia di Stato e à blocât un om di 22 agns di Napoli ritignût il responsabil presumût di une fraude di cuasi 10 mil euros cuintri di une cubie di anzians.
La tecniche e je simpri chê: lis vitimis a vegnin clamadis al telefon par visâlis che un de famee al à vût un incident e al è in preson; par fâlu jessi a ocorin cussì bêçs.
Il fraudadôr presumût al è stât cjatât parcè che al jere sot control dai agjents che i lavin daûr: cuant che lu àn viodût jessi di une cjase cun intor passe 150 grams di robe in aur, dâts de cubie visade che il lôr fi al jere in arest.
Dute la robe puartade vie e je stade recuperade e tornade ai proprietaris. Si trate, magari cussì no, dal secont fat cuintri anzians in a pene 24 oris, parcè che propit îr un altri fraudadôr al jere stât blocât dopo vê puartât vie a un om di 82 agns robe par passe 20 mil euros.
La Cuesture e vise di stâ atents e di butâ ju’ il telefon cuant che cualchidun al clame par domandâ bêçs, par dopo clamâ daurman lis Fuarcis dal ordin. (a.d.g.) – 15.05.2024
