Il coletîf di zovins al met in zûc il poete

Guido Mazzoni al è un poete, scritôr e docent universitari che al fâs ancje critiche leterarie e al à colaborât cun cierts dai gjornâi talians plui grancj. Vinars ai 17 al sarà a Udin aes 5.30 dopomisdì, ospit dal Teatri “Palamostre”, presentât des fantatis e dai fantats dal grup “Scart – la poesia che si fa” (La poesie che si fâs), un coletîf citadin di zovins apassionâts di poesie che si interesse di lei e di meti in zûc i autôrs plui innomenâts de sene poetiche taliane, traviers dibatiments vierts al public. La presentazion e sarà fate inte atmosfere particolâr dal teatri, dulà che la leture des poesiis si pant tant che un moment sugjestîf di lûs e ombris. (A.I.) – 16.05.2024