Contis di int e di civiltât dilunc dal Tiliment

Inviât intal 2023 cuntune schirie di ativitâts sul flum Tiliment a Pontaibe di Pinçan e intal Cjistiel di Ruvigne, il progjet “Approdi” curât dal Molino Rosenkranz al va indevant su la sô strade. Dopo la realizazion dal audiolibri cul stes non, cumò al è il moment de leture seniche che e conte lis storiis di passaçs sul Tiliment traviers i secui: vicendis di traghets, barcjarûi, puints, passaçs di oms potents e innomenâts. Chel che si podarà scoltâ domenie ai 19 di Mai a Spilimberc e joibe ai 6 di Jugn a Vilegnove di S. Denêl: une conte a plui vôs di int e civiltâts ator dal flum, che e va daûr di un percors storic traviers i secui, dal 1300 al dì di vuê, e al conte di passaçs di popui traviers il Tiliment e di cemût che chest “va e ven” al à influençât la storie, la economie e la culture locâl. (A.I.) – 18.05.2024