Scurtissâts îr dopomisdì trê zovins intal centri di Udin. Il prin câs tor des 6 sore sere, te androne Brovedan, e il secont pôc dopo, tra vie Carducci e vie Giusti. Si trate forsit di une barufe o di une justade dai conts, ma al è dut ancjemò di sclarî.
Intal prin câs un zovin kosovar al à scurtissât doi albanês sot dai voi de int che e passave di chês bandis. Une femine e à viodût doi zovins par tiere che a sanganavin e e à clamât daurman il 112. Il zovin plui grâf, cjapât inte panze, al è stât puartât in cundizions griviis tal ospedâl di Udin, intant che chel altri al veve une brute feride tal braç, ancje lui puartât in ospedâl.
Ferît cuntun curtìs ancje un altri zovin tra vie Carducci e vie Giusti, ma lis sôs cundizions a son mancul griviis. (a.d.g.) – 20.05.2024
