Udin: dome une partide par no lâ tal Infier

Ultime pussibilitât par l’Udin par no lâ jù in B. Domenie ai 26 al varà dome di vinci a Frusinon, se no al varà di saludâ la serie A daspò di 30 agns un daûr chel altri, a mancul che l’Empoli nol pierdedi in cjase cu la Rome. Ma al sarès miôr no stâ a domandâ masse robe ae fortune, dopo la ultime partide ai Riçs cui toscans, impatade al minût numar 104 in graciis dal rigôr di Samardzic: il gol plui “tart” di dute la storie de A. La partide e je cussì finide cu lis polemichis: l’Empoli nol à parât jù lis decisions dal arbitri, che par lôr al varès favorît i furlans. Il diretôr gjenerâl de societât blancje e nere, Franco Collavino, al è intervignût analizant ducj i câs che par l’aversari a saressin stâts a pro dal Udin – il gol anulât a Maleh sul 0-0, il rigôr dât al Udin cuant che la partide e veve bielzà di jessi finide – e ju à smontâts un par un, domandant anzit plui rispiet e atenzion pai zuiadôrs furlans. In struc, la “partide de vite” dal Udin e je za tacade une setemane prime! (A.I.) – 20.05.2024