Une mostre pal “furlan de fero”

Si scree vinars ai 24 intai spazis dal ex Mont di pietât di S. Denêl, propit tal dì che al passe il “Giro d’Italia”, la mostre dedicade a Ottavio Bottecchia, “El furlan de fero”. Un ricuart dal campion di ciclisim tai teritoris che lu àn viodût vivi e alenâsi. Il contest di chê epoche al sarà ricreât cuntune grande esposizion che si podarà viodi fint ai 30 di Jugn. Al centri, un grum di fotos di diferents archivis talians e forescj che a contin, cui tescj scrits di Franco Bortuzzo, no dome la vite di Bottecchia, ma ancje un timp e un ciclisim che aromai no son plui. A compagnâ cheste part, cualchi biciclete de epoche, riproduzions di maiutis origjinâls e une schirie des publicazions plui impuartantis dedicadis a Bottecchia, muart intune maniere misteriose. (A.I.) – 23.05.2024