Jazzinsieme: ultins concierts a Pordenon

Grant finâl plen di avigniments tra concierts a jentrade libare e a paiament, aprofondiments musicâi e visitis vuidadis par “Jazzinsieme” a Pordenon. Joibe ai 30 la Arene Calderari, inte plaçute di Pordenon cul stes non, e vierç cun doi grups di zovins e po dopo cul cjantant soul LeBron Johnson. La rassegne e va indevant cun altris concierts tai dîs che a vegnin: vinars ai 31 di Mai il tercet svuizar di funk-rock The Next Movement, sabide al prin di Jugn la cjantante soul-gospel inglese Izo FitzRoy e domenie ai 2 di Jugn cul innomenât tercet Calderazzo – Patitucci – Weckl. (A.I.) – 29.05.2024